Y Cyrsiau

NMAC (Cwrs Ymwybyddiaeth Traffyrdd Cenedlaethol)

Mae’r cwrs hwn ar gael i bobl sy’n gyrru ar draffyrdd ac a gafwyd yn goryrru’n gyflymach na therfyn cyflymder newidiol sydd ar waith (y rhai sy’n cael eu dangos yn electronig ar yr arwyddion uwch ben lonydd a’r arwyddion electronig ar ymyl y ffordd).  Mae’r cwrs hwn yn darparu hefyd ar gyfer gyrwyr sydd wedi gyrru drwy arwydd X goch i gau lôn neu arwyddion traffig awtomatig a roddir ar y rhwydwaith traffyrdd i reoli llif y traffig ac ar gyfer unrhyw dorri rheolau sy’n digwydd ar y lleiniau caled a’r mannau lloches mewn argyfwng.

Dim ond am droseddau goryrru lle gyrrwyd yn gyflymach na therfyn cyflymder newidiol y cynigir y cwrs hwn – mae troseddau goryrru am dorri’r terfyn cyflymder cenedlaethol yn cael eu cyfeirio ar gyfer y Cwrs Ymwybyddiaeth Cyflymder Cenedlaethol). Y nod yw gwneud y traffyrdd yn fwy diogel, yn fwy effeithlon ac yn brofiad gwell i bobl sy’n eu defnyddio ac yn gweithio arnynt. Ceir cymysgedd o wybodaeth, trafodaeth a myfyrio ar y pethau sy’n effeithio ar yrru pobl. Cafodd y cwrs ei lunio i fod yn ddiddorol ac yn ddefnyddiol fel bod pobl yn gadael ar y diwedd gydag awgrymiadau ymarferol i’w helpu i yrru’n ddiogel ar draffyrdd.

Mae’r cwrs yn para 3 awr a gellir ei ddilyn ar safle penodol neu ar-lein.

NRRAC (Cwrs Cenedlaethol Ymwybyddiaeth o Berygl i Reidwyr)

Mae NRRAC yn cydnabod bod reidwyr beiciau modur a mopeds yn ddefnyddwyr ffordd sy’n agored i niwed, ond nid y ffaith nad oes ganddynt lawer o’u cwmpas i’w diogelu yw’r unig reswm am hynny. Mae’r gwahaniaethau ym maint a pherfformiad y beic yn golygu bod reidwyr yn ymddwyn yn wahanol i’r rhan fwyaf o ddefnyddwyr eraill y ffordd, ac mae hynny hefyd yn cynyddu’r risgiau sy’n gysylltiedig â reidio.

Mae’r cwrs yn egluro beth sy’n achosi risgiau i reidwyr ac yn nodi sut y gallant leihau’r risg honno drwy newid eu hymddygiad. Y brif nod yw gostwng ymddygiad reidio risg uchel y cleientiaid ac, yn y pen draw, mae’n ceisio atal cleientiaid rhag profi’r canlyniadau negyddol sy’n debygol o ddigwydd o ganlyniad i’w reidio peryglus, fel gwrthdrawiadau traffig ffordd neu golli trwydded.

Mae’r cwrs yn addas i reidwyr sy’n reidio yn eu hamser hamdden ac i gymudwyr, yn ogystal â reidwyr danfon a reidwyr cludo nwyddau sydd wedi ymddwyn mewn ffordd sydd wedi tynnu sylw’r heddlu, gyda phob mathau o droseddau’n achosi iddynt gael eu cyfeirio i wneud y cwrs.

Mae’n gwrs 3 awr y gellir ei ddilyn ar safle penodol neu ar-lein.

NSAC (Cwrs Ymwybyddiaeth Cyflymder Cenedlaethol)

Nod y cwrs hwn yw gwneud y ffyrdd yn fwy diogel drwy helpu pobl i yrru ar gyflymder diogel o fewn y terfyn cyflymder. Mae’r cwrs wedi ei lunio i gymryd pobl ar daith sy’n dangos iddynt sut i wybod beth yw’r terfynau cyflymder, sut i adnabod a gwrthsefyll pwysau i oryrru – ganddyn nhw eu hunain a chan bobl eraill, a sut i osgoi gadael i bethau dynnu eu sylw. Mae’n cynnig cymysgedd o wybodaeth, trafodaeth a myfyrio ac mae pobl yn gadael ar y diwedd gydag awgrymiadau sy’n berthnasol iddyn nhw’n bersonol i’w helpu i osgoi goryrru yn y dyfodol.
Mae’r cwrs yn para 2 awr 45 munud a gellir ei gymryd ar safle penodol neu ar-lein.

SCC (Cwrs Seiclo Diogel ac Ystyriol)

Mae SCC yn gwrs e-ddysgu i bobl sy’n cael eu stopio gan yr heddlu am seiclo drwy olau coch, am seiclo heb oleuadau, neu am seiclo ar balmentydd a llwybrau nad ydynt yn agored i seiclwyr. Mae’r cwrs yn archwilio’r rheolau a’r rheoliadau allweddol i feicwyr a sut y gall y deddfau hynny helpu i gadw beicwyr ac eraill yn ddiogel ac yn helpu pobl i ddatblygu strategaethau i’w cadw o fewn y gyfraith wrth seiclo. Mae’r cwrs yn rhyngweithiol ac mae cwis ar y diwedd i weld faint maen nhw wedi’i ddysgu. Wedi iddynt orffen y cwrs, mae pobl yn derbyn cynllun sy’n bersonol iddyn nhw ynglŷn â sut i seiclo’n ddiogel ac yn ystyriol.

Mae’r cwrs yn para tua 30 munud, a gellir ei gymryd ar-lein neu drwy ofyn am lyfr gwaith. Gellir gwneud y cwrs cyfan ar yr un pryd neu ychydig ar y tro.

SCD (Cwrs Gyrru Diogel ac Ystyriol)

Cyfeirir cleientiaid at y cwrs Gyrru Diogel ac Ystyriol os ydynt yn rhan o wrthdrawiad. Mae’r cwrs yn cynyddu ymwybyddiaeth a dealltwriaeth y cleientiaid o’r pethau hyn:

• achosion a chanlyniadau negyddol gyrru peryglus ac anystyriol;
• pwysigrwydd canolbwyntio, arsylwi, rhagweld a gadael digon o ofod ac amser;
• y rhesymau pam mae eu gyrru eu hunain yn anniogel neu’n anystyriol o bosib.

Treulir rhan gyntaf y cwrs ar safle penodol ac mae’n ymdrin â gwybodaeth am arwyddion ffordd, marciau ffordd a rheolau traffig, trafodaeth a myfyrio ar bethau sy’n tynnu sylw ac yn rhoi pwysau ar bobl pan maen nhw ar y ffordd a sut i’w rheoli. Mae ail ran y cwrs yn digwydd allan ar y ffordd gyda hyfforddwr gyrru cymwysedig (ADI) lle mae cleientiaid yn derbyn anogaeth ymarferol wedi’i bersonoli ar eu cyfer ar y ffordd ac anogir nhw i greu cynllun gweithredu i fynd i’r afael â materion sy’n berthnasol iddyn nhw’n bersonol.

Hyd y cwrs yw 6 awr 55 munud.

WDU (Cwrs Beth sy’n Ein Gyrru Ni?)

Nod WDU yw creu cymunedau mwy diogel drwy helpu pobl i yrru’n ddiogel ac ystyriol, yn unol â Rheolau’r Ffordd Fawr. Mae’r cwrs yn helpu pobl i adnabod arwyddion a marciau ffordd, deall rheolau traffig a deall y pethau sy’n tynnu sylw ac yn rhoi pwysau ar bobl pan maen nhw ar y ffordd a sut i’w rheoli.

Mae’r cwrs yn cynyddu ymwybyddiaeth a dealltwriaeth y cleientiaid o:

• achosion a chanlyniadau negyddol gyrru peryglus ac anystyriol
• pwysigrwydd canolbwyntio, arsylwi, rhagweld a gadael digon o ofod ac amser
• y rhesymau pam y mae eu gyrru nhw eu hunain yn beryglus neu’n anystyriol o bosib.

Gellir dilyn y cwrs hwn ar safle penodol neu ar-lein.

YBYL (Cwrs Eich Gwregys, Eich Bywyd)

Mae YBYL yn gwrs e-ddysgu i bobl sy’n cael eu stopio gan yr heddlu am beidio â gwisgo gwregys diogelwch neu am beidio â defnyddio sedd gar priodol i blentyn. Mae’r cwrs yn archwilio ac yn esbonio pwysigrwydd gwisgo gwregys diogelwch a defnyddio sedd gar priodol i blant. Mae’r cwrs yn rhyngweithiol ac mae cwis ar y diwedd i weld faint mae’r cleient wedi’i ddysgu. Wedi iddynt orffen y cwrs, mae pobl yn derbyn cynllun personol i’w helpu i fynd i’r arfer o wisgo gwregys diogelwch bob amser.

Mae’r cwrs yn para tua 30 munud a gellir ei wneud ar-lein neu drwy ofyn am lyfr gwaith. Gellir gwneud y cwrs cyfan ar yr un pryd neu rannau ohono ar y tro.